ខេត្តកណ្ដាល៖ ក្រុមជនសង្ស័យ ៣នាក់ ក្នុងចំណោមបក្ខពួក ៧នាក់ ដែលឆក់ផ្អើលភ្នំពេញ ខេត្តកណ្ដាល និងកំពង់ស្ពឺ ត្រូវបានសមត្ថកិច្ចស្រុកអង្គស្នួល ឃាត់ខ្លួនបាន បន្ទាប់ពីធ្វើសកម្មភាពឆក់កាបូបបានសម្រេចកាលពីថ្ងៃទី១៧ ខែវិច្ឆិកា ឆ្នាំ២០២២។
មន្ត្រីនគរបាលស្រុកអង្គស្នួលឱ្យដឹងថា យុវជនទាំង៣ ដែលមានអាយុពី១៧ ដល់ ២២ឆ្នាំ បានធ្វើសកម្មភាពឆក់កាបូបពីជនរងគ្រោះជាស្ត្រី២ កាលពីថ្ងៃទី១៥ ខែវិច្ឆិកា ឆ្នាំ២០២២ វេលាម៉ោង៩ និង០៥នាទី នៅចំណុចផ្លូវជាតិលេខ៤ មុខទីក្រុងចិនសាមានា ស្ថិតនៅភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល។
ប្រភពដដែលបន្តថា៖ «នៅមុនពេលកើតហេតុជនរងគ្រោះបានចេញពីកន្លែងផ្ញើរសម្ភារៈនៅក្រុមហ៊ុនវីរៈប៊ុនថាំ ផ្សារបែកចាន ស្រុកអង្គស្នួល ដោយបានដាក់កាបូបវាន់នឹងចង្កេះ ហើយជិះម៉ូតូឆ្ពោះទៅផ្ទះនៅឃុំឆក់ឈើនាង ពេលជិះដល់ចំណុចកើតហេតុ ស្រាប់តែបក្ខពួកជនសង្ស័យជិះម៉ូតភិនភាគដូចខាងលើ បានធ្វើសកម្មភាពឆក់យកកាបូបពីជនរងគ្រោះ។ បន្ទាប់ពីឆក់កាបូបបានហើយជនសង្ស័យបាននាំគ្នាជិះគេចខ្លួនទៅទិសខាងលិចបាត់អស់ទៅ»។
ក្រោយមកជនរងគ្រោះបានរាយការណ៍ឲ្យសមត្ថកិច្ចរហូតដល់ថ្ងៃទី១៧ ខែវិច្ឆិកា ឆ្នាំ២០២២ កម្លាំងផ្នែកជំនាញ និងប៉ុស្ដិ៍ បានចេញល្បាតតាមបណ្ដោយផ្លូវជាតិលេខ៤ ឃើញជនសង្ស័យកំពុងជិះម៉ូតូដោយមានសកម្មភាពមើលមុខ មើលក្រោយ ដោយសមត្ថកិច្ចមានការសង្ស័យ ក៏ហៅជនសង្ស័យទាំង ៣នាក់ទៅអធិការដ្ឋាននគរបាលស្រុកដើម្បីសួរនាំក៏ត្រូវបានពួកគេសារភាពចេញមក។
ឥឡូវនេះសមត្ថកិច្ចកំពុងតាមឃាត់ខ្លួនបក្ខពួក ៤នាក់ទៀតដែលកំពុងរត់គេចខ្លួន។
បើតាមការឱ្យដឹងពីសមត្ថកិច្ច ចំពោះជនសង្ស័យទាំង ៣នាក់ និងបក្ខពួក ធ្លាប់ធ្វើសកម្មភាពឆក់ នៅស្រុកអង្គស្នួល ៣លើក នៅផ្លូវ៤១ ខេត្តកំពង់ស្ពឺ ១លើក និងនៅរាជធានីភ្នំពេញ ជាច្រើនលើក។ ក្នុងនោះជនសង្ស័យឈ្មោះ ប្រាក់ វុត្ថារិទ្ធ ហៅប៉ែត ធ្លាប់ជាប់គុកក្នុងខេត្តកំពត ចំនួន ១ឆ្នាំ ៦ខែ ពាក់ព័ន្ធនឹងហិង្សាដោយចេតនា និងជាប់គុកព្រៃសរយៈពេល ១ឆ្នាំពីបទប្រើប្រាស់សារធាតុញៀនផងដែរ៕
